“Palio teatrale studentesco” cence bêçs de Regjon: si va al Tar

Inte sede dal Teatro Club di Udin a son stadis anunziadis lis resons pal ricors fat al Tar dopo che la Regjon e a dineât i finanziaments regjonâi pe ativitât e metût in pericul une realtât tant che il Palio teatrale studentesco, atîf di plui di sessante agns. La Regjon, inte valutazion dai ponts par un progjet trienâl cun co-direzion artistiche di Giuliana Musso, no à assegnât al Teatro Club il massim dai ponts domandâts, parcè che nol varès avonde “tradizion culturâl”. Dopo vê domandât sclariments ae Regjon, i vertiçs de associazion a àn decidût duncje par un ricors al Tar. La prime udience e je stade clamade pal 22 di chest mês. (A.I.) – 13.03.2023