La provincie di Udin e je chê indulà che si vîf miôr in Italie. Al è ce che al ven fûr de trentesime cuarte edizion de investigazion dal Sole 24 Ore. La provincie di Udin e je lade sù di 11 posizions a pet dal an passât e e monte pe prime volte sul podi, dopo che si jere plaçade inte top ten dome trê voltis dal 1990 a vuê: 2016, 2020 e 2021.
Al decim secont puest Triest (che e piert 5 posizions), al decim cuart Pordenon (che ‘ndi vuadagne 12) e al vincjesim otâf Gurize, che e va indaûr di 9 caselis. A nivel nazionâl si posizionin al secont e tierç puest Bologne e Trent. A sierâ la classifiche a son invezit Napoli, Caltanissetta e Foggia.
La classifiche e je stade butade jù cjapant in esam 90 indicadôrs in ognidune des 107 provinciis talianis. A premiâ chê di Udin a son ciertis prestazions particolârs: il prin puest par cualitât de vite des feminis (tra tas di ocupazion feminine, percentuâl di feminis aministradoris, nivel di disvantaç ocupazion di gjenar e sperance di vite a 85,4 agns) e l’otâf par cualitât de vite dai fruts; il record di palestris, pissinis e centris pal benstâ fisic; il cuart puest inte categorie “Justizie e sigurece” pe limitade frecuence di fûcs, delits informatics e robariis di autoveturis. Al è miôr ancje pe basse incidence di fameis cun Isee sot dai 7 mil euros e di impresis in faliment.
Triest al è prin in Italie inte categorie “Culture e timp libar”, seconde sedi par indiç di sportivitât che ae vôs “Afârs e lavôr”. La provincie di Pordenon e je tierce sedi inte categorie “Justizie e sigurece” sedi in chê “Ecosisteme urban”, che e misure la prestazion ambientâl. (a.d.g.) – 04.12.2023
