Il panorame dal cjistiel al vâl dome se al è public

da Alessandro Di Giusto

Il Cjistiel di Morùs al è privât e la viste sul teritori ator e pues jessi gjoldude dome dai sôi proprietaris. Par chest, il Comun nol pues meti intal Plan regoladôr normis pensadis par preservâ il panorame osservât dal cjistiel. Al è un dai motîfs che il Tar dal Friûl Vignesie Julie al à acetât il ricors di un citadin che il municipi i veve refudât la domande di costruî une cjase inte zone a Sud dal Cjistiel.

La vicende e rimonte al Fevrâr 2019, cuant che il proprietari di un teren edificabil al à presentât la domande. Doi agns dopo, il Comun al à aprovât la variante 23 tal Plan regoladôr, che al à slargjât lis fassis di tutele e valorizazion paisagjistiche za presints par “preservâ lis prospetivis visuâls percepibilis tant dal Cjistiel cetant bande il Cjistiel”. Chest teren al jere deventât duncje inedificabil e di chest divignudis il ‘ no’ ae gnove struture.

Il citadin al à fat ricors al Tar che i à dât reson. Il judiç al à nomenât un espert, che al à verificât cemût che la gnove cjase no impedirà la viste dal cjistiel de planure e che al sarà tant mancul impatant a pet di altris edificis za che a esistin in chê fasse. Cun di plui, intal rigjet de domande, il Comun nol à proponût nissun miorament al progjet par morestâ l’impat visîf. Par chest il Tar al à anulât sedi il rigjet, sedi la variante 23 su chel teren particolâr. (A.D.G.) – 3.01.2023

Lasse un coment

Redazion

logo

Editoriale Il Friuli Srl
P.IVA 01907840308

Regjistrazion al Tribunâl di Udin n. 9

dai 6 di Lui dal 2022

PRIN PLAN

Chest sît al dopre i cookies par miorâ la tô esperience di navigazion. Lant indevant tu acetis la nestre informative su la privacy. Acetâ Lei di plui