Aes 10 plui o mancul di vuê a buinore la sale operative dal comant des Vuardiis dal fûc di Pordenon e à vût une clamade che e segnalave un fûc dentri di une ativitât di dipuesit e comercializazion di solventis a Prate di Pordenon. Daurman a son stadis inviadis sul puest 3 scuadres (une de sede centrâl, une dal distacament di S. Vît e une dal distacament di Mote di Livence – Trevîs) supuartadis di une autoscjale, trê autobotis, un camion pal traspuart dal licuit schiumogen e il funzionari di vuardie dal comant di Pordenon.
Rivâts sul puest lis Vuardiis dal fûc a cjatavin dut il personâl dal implant al esterni, intal pont di racuelte definît dal plan di evacuazion, intant che la scuadre antifûc aziendâl e veve contignût za lis flamis che a vevin cjapât un machinari. I pompîrs a àn duncje a terminât lis operazions di distudament e scomençât lis operazions di bonifiche e metude in sigurece.
Trê assegnâts antifûc de scuadre aziendâl a son stâts traspuartâts, dal personâl sanitari intervignût sul puest, al pront socors dal ospedâl di Pordenon par aciertaments stant che dilunc des fasis di distudament a àn inalât i fums de combustion. (A.D.G) – 20.01.2023
