Frute muarte a Prate, i prins ats tirâts sù dal ospedâl

“O vin prime di dut di capî ce che al è sucedût. E par chest il miedi legâl Antonio Cirnelli al fasarà intes prossimis oris un esam esterni dal cuarp”. A son lis peraulis di Maria Grazia Zaina, procuradôr de Republiche di Pordenon tal doman de muart di Natalia Wan Wincle, la frute di dodis agns cjatade muarte martars di buinore inte sô cjase a Prate. La frute si jere fate mâl al zenoli intal vinars di chê altre setemane intant che e zuiave une partide di football american inte base di Davian. I genitôrs le vevin puartade tal ospedâl di Pordenon, ma dopo cualchi esam Natalia e jere state mandade a cjase. La muart, che e podarès jessi leade a un trombi che al à provocât une embolie, e varès di jessi rivade tor des dôs di gnot. (a.d.g.) – 06.03.2024