Un incident tra un scuelebus de Eurotours e une Fiat Tipo al è sucedût vuê dopomisdì, aes dôs, in vie Falzago a Pasian di Pordenon.
Par causis cumò al studi dai carabinîrs dal Nucleo Radiomobile di Sacîl, ae altece de curve Facca i doi mieçs si son dâts cuintri in maniere frontâl.
Intal scuelebus, vuidât di un om di 24 agns di Pasian, a jerin une ventine di students des scuelis mediis: doi a son restâts ferîts in maniere lizere. Contusions ancje pai vuidatôrs dai doi mieçs. Ducj i ferîts, une volte vudis lis primis curis sul puest, a son stâts puartâts par aciertaments tal ospedâl di Pordenon.
Il rest dai fantaçuts al è lât sù suntun altri mieç. In principi, par pôre che lis consecuencis dal incident a fossin plui grâfs, si jere metude in moviment une machine imponente dai socors cun tantis ambulancis, machinis di emergjence mediche e scuadris des Vuardiis dal fûc rivadis di Pordenon, S. Vît dal Tiliment e Mote di Livence. Part di vie Falzago e je stade sierade par dôs oris ae circolazion dai mieçs. (a.d.g.) – 24.10.23
