Nol è nissun alarme incuinament intal Tiliment, intai flums o intes aghis di falde dal Friûl-Vignesie Julie. Lu precise la Agenzia regionale per la protezione dell’ambiente (Arpa FVG) dopo de difusion, intai dîs passâts, di cualchi servizi sul stât di cualitât des aghis regjonâls.
Lis conclusions dai controi a dimostrin che no je nissune emergjence, tignint ancje cont che il legjislatôr al à fissât di pôc dai limits tant plui restritîfs. Lu dimostrin i numars: intal periodi 2014-2019: il 91% des 200 stazions di control dilunc dai flums regjonâi a presentin un stât di cualitât chimiche “bon” (9% classificât tant che “no bon”); il 54% des 328 stazions a presentin un stât ecologjic “bon” o “alt”, il 30% al è “suficient”, il rest “pôc” o “trist”.
Chescj risultâts a confuartin ancje in confront cu la medie europeane che e segne intal 40% (plui o mancul) i cuarps idrics classificâts cun “bon” o “alt” (font EEA – Agenzia Europea dell’Ambiente).
La Agjenzie regjonâl pal ambient e controle cun costance lis aghis regjonâls intune rêt fisse di stazions di monitorament midiant la SOS Cualitât des aghis internis ,che intal periodi Zenâr-Setembar 2022 al à fat za plui di 300 jessudes gjavant passe 750 campions di aghe e plui di 250 campions biologjics. (ADG) – 17.11.2022
