Flamis controladis daspò di undis dîs

Il fûc che al bruse su la Mariane e sul Cuel Feltron a Damâr di undis dîs al reste impiât, ma al è controlât. Lis ultimis notis dal comunicât de Protezion Civîl a confermin il progrès des operazions par studâ il fûc, in gracie de ploie rivade in bondance lunis tal dopodimisdì e ancje vie pe gnot. Cumò si spietin lis gnovis ploiis di joibe par sierâ biadelore la emergjence. Intant, a Tumieç, a son stâts revocâts i ordins di evacuazion dal borc di Pissebus, dulà che cualchi abitant al jere za tornât a cjase lunis di sere, e ancje la sieradure de strade che e puarte a Dieç, za tornade a vierzi. Il monitorament de bande de ARPA al va indevant: lis massis di aiar a son stadis messedadis e lis emissions dai fûcs a son diminuidis, cuntune cualitât dal aiar miorade e lis concentrazions di PM10 che si son sbassadis. Altris fûcs a son ancjemò atîfs sul teritori e un gnûf al è tacat a Contron di Claut, te provincie di Pordenon. (A.I.) – 18.08.2026