Il cuarp di une fantate di 22 agns al è vignût fûr des aghis dal torin Cjarsò, pôc lontan de strade provinciâl 23.
L’alarme al è stât dât pôc dopo des 10 di matine: sul puest a son rivâts daurman scuadris dai Vigjii dal fûc, tecnics dal Socors alpin, i sanitaris dal 118 e l’elisocors. Magari cussì no pe zovine nol jere plui nuie ce fâ e i socoridôrs no àn podût fa altri che recuperâ il cuarp e declarâ la muart.
Sul fat a stan investigant i carabinîrs, ma la comunitât di Paulâr e je restade cence peraulis par cheste tragjedie, intant che, tal stes timp, a pocje distance dal lûc indulà che al è stât cjatât il cuarp, e jere la cerimonie di scree dal gnûf puint su la strade regjonâl 23 de Val d’Incarojo, ae presince dal assessôr regjonâl aes Infrastruturis Cristina Amirante. (a.d.g.) – 01.09.2026
