Cjatade la famee sparide e fin des operazions di ricercje de famee di Piacenza sparide tal nuie dal Avrîl passât, cuant che une mari cui siei fîs e cuatri cjans e veve lassade la machine parcade a Tarcint, ma il dubi che a fossin al sigûr di cualchi bande e che a vessin decidût di fâ pierdi lis lôr olmis al jere fondât. La gnove e je rivade de Procure de Republiche di Piacenza che e à sotlineât che Sonia Bottacchiani, adun cui fiis Nishanta e Joshua Groppi a son in buinis cundizions di salût e si cjatin intun puest indulà che a vivin ben. La Procure e à però visât che no saran dadis altris informazions par vie dal fat che la femine e je in pinsîr che si puedi savê indulà che si cjate e che se chest al ves di sucedi e tornarès a scjampâ.
“O sperin – si lei inte note de Procure – che midiant un lavôr pazient di scolte des problematichis si rivi a ricomponi une situazion familiâr che Bottacchiari e à contat jessi une vore problematiche, cul fin di permeti a je e ai fiis di tornâ tal lûc di residence”
Lis investigazions a laran dut câs indenant pai reâts di sotrazion consensuâl di minôrs e mancjade esecuzion dolose di un proviodiment dal judiç. (a.d.g.) – 13.05.2026
