Marco Cossi, 48 agns, nassût a Tisane, al è stât copât cuntune cuindisine di scurtissadis vie pe gnot passade dilunc di une strade di Padue.
Nol somee che a sedi stade une rapine parcè intor al veve documents, tacuin e telefonin. E propit sul telefonin i agjents de Scuadre mobile a sperin di cjatâ cualchi informazion che ju puedi judâ a risolvi l’omicidi di un om che nol veve precedents, che al lavorave intune aziende de logjistiche inte citât venite e che al viveve di doi agns cu la mari a Brusegana, indulà che al jere lat a stâ daspò che si jere separât de femine.
La vitime e je stade scurtissade cun violence tal pet e te panze.
La arme par cumò no je stade cjatade e forsit e podarès jessi stade butade tal flum o tai cjamps che a son dongje de strade blancje. Pôc lontan dal cuarp e je re la machine di Cossi, cu lis puartis ancjemò viertis e lis clâfs intor.
Al somee che l’om nol sedi muart daurman e che cundut che al jere ferît in maniere grivie al vedi rivât a clamâ in jutori dai zovins che a passavin cu la moto e daspò jessis fermâts a àn clamât daurman i socors che no son rivâts par timp, parcè che l’om al muart pôc dopo par vie de emoragjie. (a.d.g.) – 20.04.2026
