A son di pôc finîts i lavôrs di manutenzion des rêts par puartâ vie la aghe inte zone dal Friûl de Alte e de Tor, costâts plui o mancul 500 mil euros, finanziâts cui bêçs cjapâts dal Consorzi di bonifiche dal plan furlan su la fonde dal gnûf plan di classificazion pe distribuzion dai coscj. E je invezit za stade inviade la programazion dai lavôrs di tacâ inte prossime Sierade.
Cuntune note inviade a ducj i Comuns interessâts, il Consorzi al à mandât la liste dai intervents, ven a stâi tai di plantis, seâ e meti a puest i canâi di scolament, che a costaran come l’an passât mieç milion di euros. Par chest al è stât domandât aes aministrazions comunâls di visâ se a son problematichis idraulichis sul lôr teritori.
I lavôrs a saran fats su cetancj cors di aghe tai comuns di Buie, Cividât, Colorêt di Montalban, Faedis, Feagne, Maian, Muimans, Murùs, Pagnà, Paulêt, Remanzâs, Rivis Darcjan, S. Denêl e Trep Grant, su la fonde des prioritâts e des dibisugnis dal teritori.
“Chescj lavôrs – al splee Massimo Ventulini, responsabil des ativitâts di manutenzion dal Consorzi – al à l’obietîf di meti a puest lis funzionalitâts idraulichis dai riui e dai canâi di scolament. Ancje se si trate di solit di intervents di manutenzion ordenarie, no son stâts trascurâts i aspiets ambientâi e dal paisaç, cuntune vore di atenzion su cemût gjestî il materiâl tirât vie”.
“Chescj intervents – al sotlinee il diretôr gjenerâl dal Consorzi Armando Di Nardo – a son cuvierts cui paiaments de tarife di bonifiche tacant dal 2024 par cierts teritoris; il Consorzi al fâs i intervents e, su la fonde dai beneficis, al domande ancje i bêçs”.
Al è propit sul paiament di cheste tarife che, in cetancj comuns, a son sclopadis lis polemichis e si stan organizant comitâts spontanis di citadins che a protestin pal fat che al ven fat paiâ ancje a cui che, magari parcè che al vîf intun condomini lontan dai cjamps, nol à nuie a ce fâ cui canâi di scolament o cun altris problemis. I comitâts a stan cjapant sù firmis cuintri di chê che a àn clamade ‘tasse su la ploie’ e a àn ancje domandât che de cuistion si feveli intal Consei regjonâl. (a.d.g.) – 23.05.2025
