Cjatât muart un om dongje di une casere di Polcenic

Un om di etât aparente di 75 agns al è stât cjatât cence vite chest dopomisdì intal teritori di Polcenic, a pocje distance di une casere.
Doi cicliscj che a jerin daûr a passâ dilunc un troi dongje la malghe a àn viodût une veture cun dentri un om cence sens.  E je partide daurman une clamade al numar unic di emergjence 112. I infermîrs de sale operative a àn vuidât al telefon i doi cicliscj intes operazions di rianimazion, duradis a lunc.
Intant al è stât mandât sul puest l’elisocors che però al à scugnût tornâ indaûr par vie de pocje visibilitât in zone. E je rivade sul puest invezit une machine di emergjence mediche.  Magari cussì no nol è restât altri di fâ se no decretâ la muart dal om. Sul puest i Carabinîrs de Compagnie di Sacîl. Alarmâts intun prin moment ancje i piompîrs. (ADG) – 17.11.2022