Tragjedie cheste matine a Davian, dulà che une anziane e je stade cjatade muarte dentri de sô abitazion, in vie Mulino 15. La vitime e je Esterina Candotto Marchiò di 86 agns.
Secont une prime ricostruzion, dentri de abitazion si sarès discjadenât un fûc, partît probabilmentri de stue in cusine.
La badante de femine e à clamât il 112 a pene rivade in cjase, pôc dopo lis 7 di vue a buinore. Lis Vuardiis dal fûc rivâts in curt cui Carabinîrs de Compagnie di Sacîl e i sanitaris cuntune machine di emergjence mediche, no àn cjatât però nissun fugaron in at, ancje se inte abitazion a jerin a clâr presints i segns de combustion, ancje sul cuarp de femine, di là dal fum e de temperadure alçade.
La femine si cjatave a tiere propit devant de stue aromai cence vite.
Sul puest al è stât fat intervignî ancje il miedi legâl. Altris investigazions a son in cors par scalrî se la femine e sedi muarte pes ustions, par intossicazion di fum o par altris resons. E je stade decidude la autopsie. (A.D.G.) – 16.12.2022
