La Polizie feroviarie di Udin e à cjapât une bande di grafitârs che di agns e sporcjave i trens in soste tes stazions di Udin e Basilian, fasint dams impuartants a Trenitalia e dant ancje problemis al servizi.
La investigazion e je stade inviade daspò dai dams cjatâts tal Març passât e à permetût di cjatâ i cuatri zovins che a rivavin di Parme e Vicence vie pe gnot.
In graciis dai sistemis di video control e de analisi tecniche dai grafîts la Polfer e il Compartiment di Triest a àn inviât percuisizions intes abitazions dai indagâts secuestrant une vore di materiâl. Cun di plui, tal princip di chest mês, i agjents in colaborazion cun Fs Security a àn scuviert un altri grup di grafitârs in azion recuperant siet russacs cun dentri 124 bombulutis di colôr. Un dai grafitârs, un che al rivave di Trevîs, al è stât identificât e denunziât. (a.d.g.) – 25.11.2025
