La Polizie di Stât e à cjatât e denunziât un grup di minôrs di etât che a son considerâts i responsabii di cetantis rapinis fatis dentri dei trens regjonâi tra Udin e Gurize
Lis investigazions fatis dai agjents de Polizie feroviarie di Udin a son tacadis il 26 di Fevrâr passât, cuant che su la trate Cormons – Udin un zovin di 19 agns al jere stât rapinât dal so orloi e des scufis par scoltâ musiche di trê fantats. In graciis dal intervent di un poliziot fûr servizi, doi dai delincuents a jerin stâts identificâts daurman.
Une altre rapine e jere stade fate cuintri di un minôr di etât e la Polizie e veve blocât il rapinadôr intant che al lave ator pe stazion di Udin, su la fonde des descrizions fatis de vitime.
Ducj i zovins rapinadôrs a son stâts denunziâts ae Procure de Republiche dal Tribunâl pai minôrs di Triest par rapine. (a.d.g.) – 31.03.2026
