Brut timp: dams par milions di euros

E je passade la perturbazion che par cuatri dîs e à tocjât la nestre regjon dal mâr ae alte planure e ce che al reste cumò e je la conte dai dams. Inagaments, slacs, arbui colâts jù e stradis interotis un pôc dapardut, di Clausêt – dulà che e je une gruesse lavine – a Sedilis di Tarcint. I dams piês, di milions di euros e ancjemò di cuantificâ, a son stâts chei tes localitâts di mâr. Grau e je lade sot aghe pe alte maree, che e à mangjât grancj tocs di lît. A Lignan la rasule e je stade invadude di troncs di arbui. A Triest, il mâr al è jentrât in citât e al à distrut lis rivis e implants balneârs tant che chel di Barcola, intant che a Mugle e je stade fate a tocs une strade costiere. (A.I.) – 06.11.2023