Une persone e je stade socorude chest dopomisdì pes feridis che e à ripuartât par vie di un incident sucedût lunc la statâl 54 intal teritori di Remanzâs, prime dal passaç a nivel. La veture, dopo vê pierdût il control, e je lade fûr di strade butant jù il muret che al separe la strade statâl de linie feroviarie Udin–Cividât finint sui binaris e capotantsi.
Lis Vuardiis dal fûc a àn metût in sigurece il mieç incidentât e la aree dal incident – il vuidadôr lât fûr dal auto in maniere autonome al jere stât za assistût dal personâl sanitari – e a àn domandât l’intervent de autogru de sede centrâl di Udin par dislontanâ il veicul dai binaris e cjariâlu suntun autosocors.
Sul puest, personâl sanitari e fuarcis dal ordin. La persone e je stade assistude dal personâl medic infermieristic e traspuartade in cundizions gravis, ma no in pericul di vite, tal ospedâl di Udin. Il trafic tra Udin e Cividât al è stât blocât de polizie feroviarie. Sul puest ancje i agjents de Polizie locâl. (a.d.g.) – 04.09.2023