Temporâi cun ploie fuarte a son daûr a rivâ su dut il Friûl-Vignesie Julie. Lis previsions a previodin ploiis bondantis par 24 oris, des 9 di doman di matine, vinars ai 22 di Setembar, aes 9 di matine di sabide. Viodudis lis criticitâts pussibilis ae rêt idrografiche minôr e di drenament urban, la Protezion civîl e à mandât fûr un stât di alerte (zale), il decim otâf di chest an.
Il brut timp al sarà judat de largje depression atlantiche in svicinament che e favorirà corints umidis e instabilis di sudovest su la regjon.
Chestis lis previsions dal timp: vinars ai 22 di Setembar cîl pal plui grîs cun ploiis in gjenar intensis, a nivel locâl ancje tant intensis e a saran pussibii ancje temporâi fuarts. I episodis plui significatîfs si varan inte seconde part de zornade. Sabide ai 23 di Setembar: cualchi temporâl cun ploiis a nivel locâl bondantis, forsit ancje intensis. (a.d.g.) – 21.09.23
