“E je une zornade tant impuartante”. A son lis peraulis ditis cheste matine dai gjenitôrs di Giulio Regeni, Claudio e Paola, prime di jentrâ intal tribunâl di Rome pe prime udience dal procès a cuatri agjents dai servizis segrets egjizians, acusâts dal secuestri e dal omicidi dal ricercjadôr di Flumisel, copât al Cairo intal 2016. Fûr de citadele judiziarie, la poie ai familiârs cul strisson ‘Veretât par Giulio Regeni’. I cuatri agjents a son stâts rimandâts a judizi ae fin di un iter judiziari intorcolât e dopo che la Cort Costituzionâl, a Setembar, e veve gjavât il procediment fûr dal pantan là che al jere finît par vie de assence dai imputâts.
La prime udience dal procès e je stade dedicade dome aes ecezions preliminârs de bande dai difensôrs dai cuatri egjizians, che a àn domandât ai judiçs di declarâ la nulitât dal decret che al dispon il judizi suntune serie di cuistions come la indeterminatece dal cjâf di imputazion e il difiet di jurisdizion. Des difesis al è stât domandât, cun di plui, di comunicâ ae autoritât egjiziane che la sentence de Consulte e à “fat cambiâ lis robis, in mût di fâ declarâ al Cairo la assence di lôr citadins”. Ecezions che la Procure di Rome, rapresentade in aule dal procuradôr zontât Sergio Colaiocco, al à replicât sostignint che za altris judiçs si son esprimûts in passât mandantlis indaûr e duncje domandant il rigjet. (a.d.g.) – 20.02.2024
