Al cres l’alarme pal sec. Pocje aghe ancje intes faldis

Anticipâ lis ordenancis dai sindics cuintri i ûs impropris de aghe par difindi il plui pussibil lis pocjis scortis disponibilis. E je ancje cheste ipotesi tra i proviodiments pussibii su la taule de Regjon. Nol jere mai sucedût prime di vuê, ma il 2023 al podarès jessi l’an indulà che lis tipichis improibizions estivis a saran adotadis fintremai in Avrîl. Ancje la ondade di brut timp che si è esauride intes oris ultimis no je stade buine di ridusi la emergjence dal sec che, in pratiche di un an, al lambiche il Friûl-Vignesie Julie. La rivade de Buere e à fat daurman svaporâ la pocje ploie colade sul teren. Tant che agricultôrs e consorzis di bonifiche a scomencin a sostignî une anticipazion des ordenancis comunâls cuintri la straçarie. Si è discutût di un tant ancje pôcs dîs za fa a Udin dilunc di une taule tecniche in Regjon cul assessôr regjonâl Stefano Zannier. “Se e ves di lâ indenant la assence di ploie, o sarìn costrets magari cussì no a solecitâ ancje lis improibizions di ûs impropri de aghe”, al à sclarît Zannier. Dal stes parê il president de Ciline Midune, Valter Colussi, che al vise cemût che lis risorsis idrichis a vedin “varis finalitâts, de irigazion ai ûs civîi e industriâls”. “O lavorìn cuintri il timp par ridusi i consums dai socis, ma se mancje la aghe, e mancje par ducj”, al à dit Colussi. Di chi la propueste, simpri plui probabile, che lis improibizions di bagnâ orts e zardins e di lavâ i autos a partissin za tra cualchi setemane. I lâts di mont a son vueits ancje par vie des manutenzions stagjonâls dai implants. A preocupâ i esperts al è il nivel des faldis soteraniis. La nêf colade dilunc dal Invier no baste a alimentâ un flus in deficit tant grâf dal 2022. Lis risultivis dal Nunciel a son in secje, il torint Midune al à une puartade smiezade a pet de medie storiche di une desene di metris cubis al secont. Al va un pôc miôr su la Ciline, ma ancje chi il cuadri nol è bon. In definitive, dome une intense cjadude di ploie e pues disfantâ il pericul di tais aes furniduris e razionaments za tacant de Vierte. (A.D.G.) – 27.02.2023