Aiaron, nêf e ploie a àn batût inte buinore la nestre regjon

Aiar frêt che al rive dal Nord Est e aiar umit di Sud Ovest a àn fat neveâ su la mont e plovi sul plan. La nêf si è sbassade fin dai 500 metris.

Lis bugadis di Bore a Triest a àn tocjât la medie dai 86 chilometris oraris cence dut câs fâ dams. Aiaron cun bugadis fintremai ai 100 chilometris oraris ancje su la mont, a Rabil, Mont Sante di Lussari, For Disore, Vivâr e Plan dal Cjaval, indulà che lis temperaduris a son ladis jù sot dai mancul 6 grâts di medie. A Sapade la bugade plui fuarte, rivade a 109 chilometris oraris. Tal fin de setemane previodût frêt ma il cîl al sarà seren. (a.d.g.) – 14.02.2025