La edizion numar 49 de Fieste de Patrie dal Friûl, ai 12 di Avrîl cu ven, e clamarà dongje i partecipants a Dartigne, cu lis sôs fortificazions antighis, i rescj de Ete di Mieç e i reperts archeologjics; e a Montenârs, un teritori che al fâs part de Risierve de Biosfere Unesco, siôr di testemoneancis storichis e culturâls, ma ancje il lûc là che al è nassût pre Checo Placerean: figure fondamentâl dal autonomisim furlan, tradutôr de Biblie e ideadôr de Fieste de Patrie, la manifestazion che la Regjon e à ricognossût in maniere uficiâl dal 2015.
La Fieste de Patrie dal Friûl – inmaneade chest an dai Comuns di Dartigne e di Montenârs, cu la poie de Regjon Autonome Friûl-Vignesie Julie e de ARLeF Agjenzie regjonâl pe lenghe furlane e in colaborazion cul Istitût Ladin Furlan “Pre Checo Placerean” –, e je une manifestazion che e vûl ricuardâ e valorizâ lis lidrîs, la culture e la storie di autonomie dal popul furlan. I furlans si prontin duncje a fâ fieste in comunitât pe lôr identitât, culture e lenghe, valôrs tramandâts dilunc des gjenerazions e che a son inmò vuê principis di fonde, a 949 agns de costituzion dal Stât patriarcjâl furlan, fondât ai 3 di Avrîl dal 1077.
L’event, e il so program in detai, a son stâts presentâts inte sede di Udin de Regjon Autonome Friûl-Vignesie Julie, ae presince dal assessôr regjonâl aes autonomiis locâls, Pierpaolo Roberti, dal president de ARLeF, Eros Cisilino, dal sindic di Dartigne, Alessandro Marangoni, che al à purtât ancje il salût dal sindic di Montenârs, Claudio Sandruvi, e dal president dal Istitût Ladin Furlan, Geremia Gomboso, che a àn ricuardât cemût che tal 2026, 50m aniversari dal taramot che al sdrumâ il Friûl, la Fieste e vedi un significât ancjemò plui alt. E jere presinte ae conference ancje la assessore regjonâl aes Financis, Barbara Zilli.
Aes 9 di matine, la zornade e tache a Dartigne, in vie Piacenza, denant de sede dai Alpins. Al è culì che si cjataran i partecipants pal tradizionâl alcebandiere dal vessil dal Friûl, compagnât de Filarmoniche “Luigi Mattiussi” di Dartigne, direzude dal mestri Herbert Fasiolo.
Aes 9.30, inte Glesie de Nativitât di Sante Marie si disarà la Sante Messe par furlan, compagnade dal Grup Corâl “Spengenberg” di Spilimberc e celebrade dai rapresentants des trê diocesis dal Friûl, cun leturis e preieris ancje par sloven e todesc. Cui che nol podarà partecipâ in presince, al podarà stâi daûr in graciis de trasmission speciâl su Telefriuli (canâl 11) che, des 9.30 indenant, e trasmetarà in direte la liturgjie e, subit daûr, la cerimonie civîl cu la trasmission “Il campanile della domenica”.
Aes 10.45, in place Marnico, denant dal Municipi, è sarà la esibizion dal Grup folcloristic “Balarins de Riviere” di Magnan.
Aes 11, tal Gnûf Teatri “Bons. Lavaroni” (simpri in place Marnico), e tacarà la celebrazion civîl de Fieste. Al screarà la cerimonie il grup folk rock “Corte di Lunas” cu la esecuzion dal Imni dal Friûl, po dopo si fasarà la leture de Bole imperiâl cu la partecipazion dal Grup storic “Il Barbacane” e i tambûrs de “Cucurbite sonorae” di Vençon. Dopo dal tradizionâl scambi de bandiere fra il sindic dal Comun di Sacîl, che al veve dât acet ae manifestazion tal 2025 e i sindics dai doi Comuns che le ospitin chest an, al sarà il moment salûts des autoritâts. Vie pe cerimonie si presentaran in esclusive ancje il video cu la gnove interpretazion dal Imni dal Friûl, “Incuintri al doman”, realizât dal Istitût Ladin Furlan “Pre Checo Placerean” e il video dal innomenât canâl YouTube YoupalTubo intitulât “Parcè che il Friûl si clame Patrie”. Finidis lis celebrazions, la zornade e larà indenant a Montenârs.
Ae une dopomisdì inte aree des fiestis, in Borc Curminie 29, al sarà il gustâ par cure de Pro Montenars, cuntun menù a presit concuardât. Cui che al vûl partecipâ a chest moment, cu la presince di Dario Zampa, al scuen notâsi mandant une e-mail dentri di misdì di joibe ai 9 di Avrîl a: istitutladinfurlan@libero.it .
Des 15.30 indenant, si torne ducj a Dartigne denant dal Teatri Lavaroni, di dulà che e tacarà une interessante cjaminade storiche archeologjiche par cure de cooperative Riscoperte. Il percors al tocjarà il cuel di Sant Martin, il Cjistiel Savorgnan e il parc archeologjic. Ancje in chest câs al covente prenotâsi, mandant une e-mail a: info@riscoperte.it .
In ocasion de conference stampe al è stât ancje presentât un video che al mostre cualchidune des tantis “Acuile in Comun” instaladis difûr dai palaçs dai 130 Comuns che a àn aderît al progjet inviât vie pe Fieste dal 2025. La iniziative, promovude de Regjon Autonome Friûl-Vignesie Julie e de ARLeF, e vûl valorizâ e promovi la identitât furlane. A ognidun dai Comuns che a àn aderît ur è stade regalade une opare artistiche che, logade fûr di un edifici rapresentatîf o intun altri lûc di interès storic culturâl, e concretize il leam dal popul furlan cu lis sôs lidrîs e la sô storie. L’autôr de opare al è il designer Stefano Borella che, tal realizâle, si è ispirât ae acuile de bandiere dal Friûl, il simbul che plui di ducj al ten adun i furlans. La organizazion de iniziative e je puartade indenant cu la colaborazion di City ADV.
Come par tradizion, i Comuns che a dan acet ae Fieste, Dartigne e Montenârs, a àn jemplât un calendari di events colaterâi che a anticiparan lis celebrazions uficiâls.
Joibe ai 9 di Avrîl, aes 20.45, inte sale dal consei dal Municipi di Dartigne, al è in program il spetacul “Rombo. Live book” di e cun Martina Delpiccolo e Fabiano Fantini, suntun progjet de associazion culturâl Colonos. Gjavade fûr dal romanç di Esther Kinsky, la opare, cemût che al spie ben il titul, e fâs un scandai inte memorie dal taramot che al scjassà il Friûl intal 1976. Il spetacul al vignarà metût in sene in colaborazion cul Teatri Stabil Furlan.
Sabide ai 11 di Avrîl, aes 20.00, intal centri polifunzionâl “Bons. Leone Quagliaro” di Montenârs, in vie Isola 10, al è in program l’incuintri “La ereditât di Pre Checo a 40 agns de sô muart”, dedicât a pre Checo Placerean. L’event al è par cure dal Comun di Montenârs, Glesie Furlane, Clape di culture Patrie dal Friûl e Istitût Ladin Furlan. A dialogaran sul teme Claudio Sandruvi, pre Romano Michelot, Andrea Valcic e Geremia Gomboso.
Ma nol è dut, parcè che, come ogni an, la celebrazion de Fieste de Patrie dal Friûl e sarà insiorade, su dut il teritori furlan, di un calendari cun tancj events culturâi colaterâi, come spetacui teatrâi, events musicâi, presentazions di libris, e v.i. A saran cirche 150 i events promovûts dai passe 80 Comuns che a àn aderît al bant par sostignî lis manifestazions che a compagnin la Fieste, promovût de ARLeF in atuazion de Leç regjonâl n. 6/2015.
Il calendari dai events colaterâi ae Fieste al è disponibil sul sît www.arlef.it . (a.d.g.) – 02.04.2026
