Cu la Ute di Buie si preparisi ai concors publics

A son numars in cressite costante chei regjistrâts de Universitât de Tierce etât di Buie che, chest an, e regjistre za 450 iscrits in ben 60 cors. “Al è un erôr pensâ che la ativitât de Ute e sedi risiervade ai pensionâts – e sclarìs la presidente Gloria Aita -. Lis iniziativis a puedin jessi frecuentadis di utents di ogni etât”. La propueste e je pardabon ample: dai cors di inglês, spagnûl e francês a chei di informatiche, de archeologjie ae leterature, de filosofie ae liriche, ma ancje lezions di dirit, medisine, astronomie. Ativitât pe ment e pal cuarp, cui cors di bal, yoga, taichi, cjaminadis culturâls. Di sigûr a son tant preseadis lis esercitazions di cusine, scaletarie, enologjie, piture, ricam, mosaic, tiessidure. “In chest an academic o vin volût disvilupâ une iniziative tant buine – e continue Aita – cuntun cors di preparazion ai concors de aministrazion publiche, là che a son tratâts argoments di dirit aministratîf e lis materiis par solit domandadis dilunc dal esam”. (a.d.g.) – 31.10.23