Cjampfuarmit al continue a plantâ un gnûf arbul par ogni creature nassude

La Aministrazion comunâl di Cjampfuarmit e à decidût di plantâ un arbul par ogni frutin neonât e e consegnarà cincuante plantis amiis des âfs, une par ogni frute o frut nassude/nassût intal 2022. “Ancje par chest an o proponìn cheste iniziative in ocasion de Zornade Mondiâl dai Dirits dai Fruts e de Zornade dai Arbui – a sclarissin il sindic Erika Furlani e il vicesindic Christian Romanini, cun deleghe al Ambient e ae Culture -. Stant che dal 2019 la Aministrazion e à inviât il progjet ‘Cjampfuarmit, amì des âfs’, l’arbul al sarà sielt tra lis speciis melifaris par sensibilizâ la opinion publiche su la impuartance des speciis impolinadoris”. Il Comun di Cjampfuarmit, che in cuatri agns al à metût passe 550 gnûfs arbui, al invide lis frutis e i fruts dal 2022 cu lis lôr fameis, sabide ai 25 aes 10.30 di matine li de Boschete Furlane di Cjampfuarmit, cul incuintri li dal Plaçâl Robert Miles devant de Scuele Elementâr di Cjampfuarmit. (A.I.) – 23.11.2023