Un percors origjinâl dilunc dai borcs di Buie tal ultin mieç secul

da Alessandro Di Giusto

Dal paîs sdrumât dal taramot 50 agns indaûr al dì di vuê, cuntune clâf di leture dal sigûr origjinâl. E je chê proponude dal libri “Buja 50 anni dopo”, opare volude cun fuarce dal imprenditôr Marino Piemonte, che e met dongje lis fotografiis fatis tai dîs dal taramot, i acuarei di Franco Bevilacqua (un dai fondadôrs dal cuotidian La Repubblica e grafic tra i plui innomenâts in Italie) e i tescj di Mirella Comino, insegnante e autore, testemonie atente de storie e de culture di Buie.

Il volum publicât di Folkest Libri e realizât cul patrocini e il jutori de Regjon Friûl-Vignesie Julie, dal Comun di Buie, de Comunitât culinâr dal Friûl e di Primacassa Credito Cooperativo Fvg, al conte la trasformazion di Buie dilunc di un percors fat di 27 tapis, cjapant cussì dentri une buine part des frazions e dai borcs che a componin il Comun.

Si tache, e nol podeve che jessi cussì, di Mont di Buie e de sô plêf, considerade il cûr storic dal paîs e si rive ae fin a S. Stiefin, che vuê al è il cjâf lûc dal Comun. Par ogni tape lis fotos fatis in chei dîs e i acuarei par mostrâ, come che e à scrit tes pagjinis che a vierzin il volum, “cemût che i borcs plui impuartants dal paîs a son tornâts a nassi”. (a.d.g.) – 17.11.2026

Lasse un coment

Redazion

logo

Editoriale Il Friuli Srl
P.IVA 01907840308

Regjistrazion al Tribunâl di Udin n. 9

dai 6 di Lui dal 2022

PRIN PLAN

Progjet finanziât de ARLeF
Agjenzie Regjonâl pe Lenghe Furlane

Chest sît al dopre i cookies par miorâ la tô esperience di navigazion. Lant indevant tu acetis la nestre informative su la privacy. Acetâ Lei di plui