Tante pôre a S. Vît de Tor indulà che une picinine di pôc plui di un an e je colade dentri de vascje dai pes tal zardin di cjase cul risi di inneâ. Il socors puartât di corse di un vicin che al veve sintût la mari berghelâ disperade al à salvât la piçule ancje parcè che al à fat lis manovris di rianimazion in spiete dai infermîrs.
Il fat al è sucedût tor des 11 di matine, cuant che la mari si è inacuarte che le fie e jere masse cidine e à tacât a cirîle e le à cjatade dentri de aghe. La frutine e veve tirât su aghe e e veve pierdût il sintiment, ma lis manovris dal zovin vicin a àn fat tornâ il sintiment tant che e à tacât a vaî.
Sul puest a son rivâts auto mediche, ambulance e elisocors. La piçule cu la mari a son stadis puartadis tal ospedâl di Udin; cumò si cjate tal repart di pediatrie indulà che e je assistude cul ossigjen. (a.d.g.) – 14.10.2026
