Inviâts a Reane dal Roiâl i lavôrs par meti jù la fibre otiche fintremai intes abitazions. L’intervent al è finanziât di FiberCop e fat in colaborazion cu la Aministrazion comunâl e al permetarà di rinfuarcî la rêt Internet su dut il teritori metint a disposizion i colegaments a citadins, impresis e aministrazion publiche.
Par fâ passâ la fibre, che e permetarà di rivâ fintremai ae velocitât di 10 Gigabite, a saran dopradis lis infrastruturis che a son za, ma se a vessin di coventâ sgjâfs gnûfs a saran fats intervents a impat bas dilunc des stradis. I lavôrs a son tacâts in vie 24 Maggio e a laran indenant inte frazion di Riçûl, par dopo slargjâsi intes altris areis previodudis dal plan di disvilup de rêt. Il program al cjape dentri ancje lis frazions di Ribis, Remugnan, Val, Vergnà, Cortâl e Çumpite. A saran metûts jù ancje siet armârs stradâi e passe 35 chilometris di fibre otiche.
“I lavôrs inviâts di FiberCop – e à dit Anna Zossi, sindiche di Reane dal Roiâl – a laran indenant tes prossimis setemanis e a permetaran al nestri teritori di vê une infrastruture aromai indispensabile par ducj i citadins. L’ufici tecnic e la Polizie locâl a son stâts cjapâts dentri te gjestion des autorizazions e dal control dai cantîrs. L’auguri al è che ducj chescj intervents a puedin jessi fats in timps curts, minimizant lis consecuencis su la circolazion stradâl”.
O visìn che dome une volte che i lavôrs a saran finîts e che la rêt gnove di fibre otiche e sarà colaudade, citadins e impresis a varan la pussibilitât di fâ un contrat gnûf cu lis aziendis che a ufrissin il servizi di colegament. (a.d.g) – 13.10.2026
