Condanâts in totâl a plui di 40 agns cinc personis imputadis tal tribunâl di Udin par associazion a delincui. Si trate di cinc tra oms e feminis dal clan Braidic, arestâts sul cricâ dal dì ai 8 di Avrîl dal 2025 dongje Udin, te suaze de operazion fate di carabinîrs e polizie di stât. Par lôr il public ministeri Andrea Gondolo al veve domandât 70 agns di preson.
La pene plui alte e je stade dade a Tomas Braidic, 31 agns, di Buri, che al à cjapât 8 agns e 10 mês. Claudio Braidic, di 55 agns, di Pradaman, al è stât condanât a 9 agns e 9 mês, ma e je colade la acuse di jessi a cjâf de organizazion criminâl. Par Caterina Kari, 34 agns di Buri, la condane e je stade di 8 agns e 5 mês e mieç. Condane a 7 agns e a 6 agns e 8 mês di preson tal ordin a Manuel e Tatiana Braidic di 35 agns, ducj e doi di Pradaman. I cinc a jerin acusâts di robarie, rapine, associazion par delincui e altri. Tal principi a jerin stâts contestâts une vore di reâts cuintri dal patrimoni, soredut robariis e fraudis, cuasi ducj scancelâts par remission de cuerele.
Il Tribunâl al à ancje confiscât Villa Giuseppe a Pradaman, indulà che lis vitimis e vignivin clamadis cu la promesse di vuadagnâ in maniere facile, par dopo viodisi robâ, e ancje un ufici a Buri. (a.d.g.) – 13.10.2026
