La musiche visionarie di Romitelli te “Cavallerizza”

Il gnûf spazi al è stât screât cinc mês indaûr, intun gnûf borc di Udin nassût dentri di un grant progjet di rigjenerazion urbane te ex caserme “Osoppo” dongje vie Cividât. Sierâts i lavôrs tal edifici di mil metris cuadrâts, che cumò al pues dâ acet fint a 600 personis (300 sentadis), lis realtâts zovinis – 31 agns la etât medie! – clamadis a gjestî “La Cavallerizza” a àn metût adun un program fint ae fin dal an La prime stagjon uficiâl dal spazi culturâl che al viôt adun te gjestion e promozion la orchestre dai zovins Filarmonici Friulani, SimulArte e la Corâl dal F-Vj, dant spazi ancje ae orchestre inclusive AMI Ritmea, al previôt 25 events in trê mês. Fint a Dicembar a saran ufierts cetante musiche classiche, ma ancje fiestis (par esempli, la Gnot dai muarts), teatri comic cu la uniche tape in regjon di Turbopaolo, une stele de ret, fiestis e altris events: i “concierts ae lûs de cjandele”, un formât internazionâl che al rive pe prime volte a Udin. Dut presentât dentri di un spazi culturâl nassût propit par jessi condividût di ducj e no dome doprât dai organizadôrs. Dongje dal “Lunis cu la Sinfoniche” cu la orchestre direte di Alessio Venier al torne il progjet de Coral regjonâl direte di Cristiano dell’Oste par presentâ dutis lis cjantadis di Bach, l’altri progjet “Liederiadi” e lis provis viertis al public de “Misa Criolla” e dal Oratori di Nadâl. Il mês di Otubar si vierç lunis al prin cuntune celebrazion d musiche e de art dal compositôr gurizan Fausto Romitelli, muart tal 2004. Aes 6 e mieze e je in program une conference cul titul “La musiche contemporanie prime e dopo Romitelli”, Aes 8, il conciert “Coming together” di dôs formazions: Ictus ensemble di Bruxelles e Index ensemble che a presentin “Amok Koma”, “Seascape” e “Trash TV Trance”: trê oparis strambis e penzis, là che la musiche contemporanie si cjate cu la eletroniche e la culture pop. (A.I.) – 30.09.2026