In graciis de bataie fate de europarlamentarie Elena Lizzi e dal so grup Lega-Identità e Democrazia, il Parlament European al à fat passâ il gnûf regolament pes Indicazions Gjeografichis, par rinfuarcî la protezion dai prodots tradizionâi e par no permeti plui fats come chei dal prosec cravuat o dal asêt balsamic sloven.
“O vin insistût une vore par meti dentri tal regolament plui difesis pes Indicazions Gjeografichis, pal setôr dal vin e pal Ufici pe proprietât inteletuâl (Euipo)” e à dit Lizzi.
“Lis decisions plui impuartantis a son chês propit pal vin – e va indenant – parcè che intai ultins cinc agns la Comission i à dât cuintri doprant argoments fûr dal semenât. In graciis di nô de Lega, lis regulis par chest setôr, une vore impuartant pal Friûl, a son stadis lassadis jenfri la Politiche Agricule Comune (Pac), che cussì e podarà rispuindi miôr e plui svelte a ce che al coventarà a dut il Mont dal vin.
Se no si faseve cussì, come che invezit a speravin lis çampis, la Comission e varès vût podê di cambiâ lis regulis cemût che e voleve, taiant planc planc dut il setôr. Al è miôr che i citadins lu savedin e che si visedin cussì cui che al difint pardabon la agriculture e cui che, a fuarce di mateçs, al cîr di fâle murî”.
La bataie, ae fin vinçude, e je state fate ancje par altris robis, no mancul impuartantis pe economie furlane.
“O vin metût un fren a prosecs forescj leant i nons dai nestris vins al lavôr dai nestris contadins – e zonte Lizzi -. Bisugne simpri stâ in vuaite: de çampe a rivin atacs un daûr di chel altri: dal scugnî meti su lis butiliis dal vin la etichete che al fâs mâl al diviêt di doprâ intai cjamps dal dut i prodots cuintri i foncs e lis besteutis.
Al somee propit che in Europe cualchidun al vedi voie di scjafoiâ une tradizion, chê dal vin, che e dure di mil e ancjemò mil agns e che e je un toc de nestre culture e identitât”.
Un altri fren zontât dal Parlament European in graciis dal sburt de Lizzi, che e je stade ‘reladore ombre’ par chest regolament, al è chel cuintri la ‘agropiraterie’, ven a stâi la vendite di prodots fals traviers l’e-commerce. Un business che dome pe Italie al fâs un dam di 100 miliarts di euros par an.
“Nô de Lega o difindìn la agriculture, i siei prodots e lis tradizions” e siere Lizzi.
(Informazion par cure dal grup “Identità e democrazia – Lega Salvini Premier”) – 20.03.2024
