In teorie agjent di cumierç, spaçadôr di droghe te realtât

da Alessandro Di Giusto

Ancjemò une operazion de Vuardie di finance cuintri dal trafic di droghe intal Friûl ocidentâl. Dopo dal arest di un buteghîr di cannabis light, che al vendeve ancje cocaine, cheste volte al è tocjât a un om che in teorie al jere agjent di cumierç, ma che te realtât al vendeve cocaine.

L’om al veve trasformât une sô cjase in ristruturazion a Sacîl intun puest indulà che al dave fûr lis dosis.

A son stâts i moviments stranis inte cjase a movi i financîrs di Pordenon che a àn arestât Luca Cordazzo, di 30 agns, cjatantlu cun 18 pachetuts che a tignivin dentri 70 grams di cocaine. L’om al veve intôr ancje 1.100 euros. Inte auto, intune borse a son daspò saltâts fûr ancje doi sacuts cun dentri 60 grams di marijuane.

E je stade dopo la volte de percuisizion inte cjase, indulà che i financîrs a àn cjatât varis materiâi, comprendûts doi belancins e dôs bustis cun dentri passe doi chilos di marijuane e 88 grams di hashish.

No jere dut câs finide: inte cjase dulà che al vîf Cordazzo a son saltâts fûr di un gjacheton 5 mil euros che si pense a rivedin dal spaç di droghe. (a.d.g.) – 29.02.2024

Lasse un coment

Redazion

logo

Editoriale Il Friuli Srl
P.IVA 01907840308

Regjistrazion al Tribunâl di Udin n. 9

dai 6 di Lui dal 2022

PRIN PLAN

Chest sît al dopre i cookies par miorâ la tô esperience di navigazion. Lant indevant tu acetis la nestre informative su la privacy. Acetâ Lei di plui