Ultimis visitis al cason di Pasolini

Joibe ai 25 di Setembar e sarà la ultime ocasion par cheste stagjon di visitâ il cason di Pier Paolo Pasolini te lagune di Grau, cetant preseade dal inteletuâl di Cjasarse, che la tignive par “un lûc de anime”. Te isule di Mota Safon, Pasolini al rivà tal 1969 par fâ cualchi riprese dal cine “Medea” cun Maria Callas protagoniste te sô uniche esperience cinematografiche: in dut a son dome 14 minûts, ma a àn fat jentrà Grau, lis sôs isulutis e i casons te storie dal cine.  Il lûcs al è curât de associazion “Graisani de Palù”, che a àn tirât su ancje un piçul museu de pescje, intant che lis escursions a son inmaneadis par cure dal consorzi Grado Turismo. La visite e tache aes 10 di buinore e si torne indaûr tal dopomisdì. Par informazions e prenotazions (la visite si paie), si pues lâ in rêt su: www.grado.it/it/eventi-ed-escursioni. (A.I.) – 23.09.2025