Al è dut pront pe partence de stagjon invernâl in Friûl-Vignesie Julie: domenie ai 3 di Dicembar al vierzarà il comprensori schiistic di Nevee cun dôs pistis e doi implants, in spiete de setemane dopo cuant che e scomençarà la stagjon ancje pe plui part des pistis de regjon. Ripâr Cai 1 e Gilberti a saran i percors praticabii, servîts de telecabine de Mont Cjanine (vierte ancje a cui che al vâ a pît) e teleferiche Gilberti. A Nevee si podarà schiâ des 8.45 buinore aes 4 dopomisdì inte part plui alte ae tarife promozionâl di 20 euros par adults e senior e a 10 euros par junior e over 75. Il skipass si podarà cuistâ in bilietarie, in linie o ae casse automatiche, tra lis novitâts di cheste stagjon che e scomençarà propit a Nevee. De setemane prossime simpri a Nevee si podarà doprâ ancje il cjamp scuele, intant che il colegament cu la stazion di Bovec, in teritori sloven, al reste pal moment no praticabil par situazions no dipendentis di PromoTurismoFVG.
A pet des viertiduris prossimis di pistis e di implants, tant al dipendarà des cundizions dal timp, ma lis previsions pai 8 di Dicembar a lassin buinis probabilitâts pe partence de stagjon schiistiche a For disore, pai cjamputs e par ciertis pistis dal Varmost, a Plan dal Cjaval cu la aree Caseris, a Tarvis, pe part plui alte, a Sapade cui cjamputs e Pian dei Nidi, intant che pal Çoncolan cu la piste 4, il cjamput a val e il tapêt in mont. (a.d.g.) – 30.11.2023
