Siet dîs a pît sul Nadison compagnâts de musiche

Par siet dîs, lis aghis verdis dal flum Nadison a son il fîl de schene di un progjet unic tal so gjenar: “Natisa”, ideât de associazion Inniò cu la poie de Regjon e di Banca 360, inmaneât te suaze di GO!2025. Nol è dome che un festival, o un conciert o une cjaminade, ma un viaç a pît e cui struments su lis spalis dilunc dut il cors dal Nadison, traviersant confins, comunitâts e lenghis (talian, furlan e sloven) di un flum che al met adun, invezit di dividi. Di lunis al prin di Setembar e fint a sabide ai 7, i protagoniscj a saran doi sunadôrs: Leo Virgili, in viaç cu la sô ghitare, e Paolo Forte cu la armoniche. Ogni sere, in lûcs straordenaris e dispès pôc cognossûts, si davuelzarà un event musicâl e performatîf diferent, spartît cun artiscj locâi e ospits speciâi. Ogni dì, une gnove tape di fâ a pît, vierte a cui che al vûl zontâsi (cun partecipazion libare e cence sore nuie). Il progjet si complete cuntune conte sonore di Paolo Cantarutti (un podcast) e une visive curade di Stefano Giacomuzzi (foto e video).L’itinerari al tache de frazion di Platiscjis, tal cûr di Taipane, par rivà là che il Nadison al nas. Tai dîs che e vegnin, il grup al larà su la cime dal Mataiûr par viodi il flum di adalt e in muel tes sôs aghis par sintîlu di disot: di Bergogne a Levrons di Premariâs, fint ae ultime tape ai Cjasâi Birri di Manzan, là che si fasarà une grande fieste vierte a ducj. (A.I.) – 01.09.2025