Un viaç romantic e spirituâl, traviersât de lûs di piçulis lanternis, cu la musiche de tradizion che si instrece cul rumôr de nêf sui arbui, intant che cualchi opare di art su la strade e vierç puartis di imagjinazion su tradizions antighis, di cuant che l’om al cjaminave in sintonie cu la nature. Al sucêt, compagn di cualchi an in ca, a Valbrune in Valcjanâl, là che ducj i fins de setemane dal Avent il Nadâl al devente alc di diferent, di insium, une cjaminade a pas lent par condividi une altre bielece. Daspò dai apontaments di Novembar, dai 6 ai 8 di Dicembar e ancje dai 13 ai 14 e dai 20 ai 21, il borc al presente il tradizionâl “Advent Pur”: no dome un event, ma une esperience di fâ a pîts, o suntune slite a cjavai. A Valbrune si pues lâ daûr dal percors di 2,7 km, un troi cence fâ masse fadie dentri dal bosc e te plane dal paîs, cu lis lûs e lis statuis di len dut intor, e ancje une audiovuide, “Maca Advent Pur” di doprâ cul telefonin e un QR Code. (Par informazions su lis ufiertis e i presits: visitvalcanale.it) (A.I.) – 05.12.2025
Foto di T. Gualtieri
