La nestre regjon e jentre ancje intun videozûc internazionâl

La promozion turistiche dal Friûl-Vignesie julie e passe ancje traviers i videozûcs. La regjon e je la prime in Italie che si presente e che e à decidût di fâsi publicitât doprant un videozûc une vore cognossût, Fortnite, un dai plui innomenâts tal Mont. Daûr dai numars, un tierç dai talians al zuie a Fortnite, che si pues discjamâ a gratis, cence sore nuie: cutuardis milions di utents, che a deventin 650 in dut il Mont. Adun cun Novo Esports, la Regjon e à decidût di zontâ cualchi gnûf senari pal zûc: lis citâts di Triest, Pordenon, Gurize, Udin e Palme, là che i personaçs dal zûc cumò a puedin movisi. La mape e sarà presentade ancje te suaze di un torneu che si fasarà a Milan, là che i prins cinc in classifiche a podaran vinci une permanence te zone di Tarvis. Il zûc al sarà acessibil cu lis novitâts, presentadis dal president de Regjon, Massimiliano Fedriga, di sabide ai 20 di Setembar. (A.I.) – 17.09.2025