La foreste che e sune te ‘Saisare

Cence i arbui no saressin stâts Stradivari, Guarneri, ma nancje Mozart, Beethoven, Bach e forsit la musiche dute. Peraulis di Boris Preschern, sindic dal Comune di Malborghet e Valbrune, che pe decime prime volte al inmanee une rassegne, “Risonanze”, che e tache di un messaç clâr e net: fa capî che la foreste e je un patrimoni par ducj. Il festival nol puarte la musiche in sene e vonde, ma la torne a puartâ là che e je tacade, tal mieç dal bosc di peç de Val ‘Saisare, chel len armonic che al devente strument e vôs, di simpri. La rassegne metude adun dal diretôr artistic Alberto Busettini no je dome une ufierte culturâl uniche, ma une ocasion par vivi un patrimoni naturâl cetant grant, fint al principi dal sunôr, lassantsi tirâ dentri dal dialic jenfri strument e musicist, musiche e nature, sunadôr e liutâr. Dai 18 ai 21 di Jugn, si che duncje, tal bosc no sarà dome grande musiche, ma cjaminadis, benstâ, incuintris, laboratoris, ativitâts par fameis e cualchi grant liutâr. I concierts a saran come simpri dilunc de Forest Sound Track e tal viert dal bosc, ma sot sere ancje tal palaç Veneziano e te place tal centri di Malborghet, la che a rivarà une delegazion de citât todescje di Bamberga, innomenade pe sô scuele di musiche. La liste dai concierts e je lungje – la ghitariste Romy Resatsch, il Michelsberg Streichquartett, il violinist Lucio Degani e la orchestre “Ferruccio Busoni”, il pianist Rudy Fantin e cetancj altris, fint al conciert dal solstizi cu la Orchestre Audimus. (A.I.) – 17.06.2026