La domenie su lis olmis di Basaglia

Dôs visitis vuidadis speciâls dedicadis a Franco Basaglia e ae straordenarie esperience di mudament sociâl e culturâl scomençât a Gurize tai agns Sessante dal 1900 a son programadis par domenie ai 7, te suaze de cuarte edizion di “Crocevie d’Europa”, croseris de Europe, une iniziative turistiche culturâl dal comun di Gurize. I zîrs, promovûts de cooperative sociâl La Collina adun cul comun di Gurize pal progjet “La citât dai mats”, a puartin i visitadôrs traviers dal parc Basaglia, tai spazis dal ex ospedâl psichiatric che al à viodût la nassite di une des plui impuartantis rivoluzions civîls dal secul passât in dute Italie. Al è stât propit a Gurize che, dal 1961, il psichiatri Franco Basaglia al à scomençât une trasformazion profonde de istituzion: il prin pas viers la riforme psichiatriche. L’ex ospedâl psichiatric, vuê mudât intun grant parc urban viert ae citât, al conserve ancjemò i edificis di chê volte, testemoneancis e lûcs simbolics di un timp di cambiament. A son in program doi zîrs: aes 11 di buinore, chel dai dirits, dedicât ae vite dentri de istituzion, e aes dôs di dopomisdì il “percors societât”, un itinerari che al tache de memorie storiche dal ex ospedâl psichiatric. La partecipazion e je libare, ma bisugne notâsi dentri di vinars ai 5 di buinore, contatant i organizadôrs par email a:crocevie.europa@gmail.com” crocevie.europa@gmail.com. (A.I.) – 04.06.2026