E à dât par dabon spetacul îr sot sere e fintremai dopo de miezegnot la autore boreâl causade di une tampieste solâr une vore fuarte. Pôc dopo che il soreli al jere lât jù il cîl si è impiât di colôrs, soredut il ros e ancje il vert, colôr chest ultin che al fâs intindi trop fuarte che e jere la rivade inte nestre magnetosfere, il cjamp magnetic che al pare la tiere des radiazions solârs, che metût sot pression al lasse passâ un pocjis des parteselis mandadis fûr de nestre stele.
Ancje in graciis dai Social a àn tacât a rivâ une schirie di imagjinis come che no si viodeve dal an passat, cuant che e jere stade une altre tampieste une vore fuarte. Par fortune cheste volte tal cîl no jerin nûi a platâ che spetacul dal dut naturâl.
Cumò ce tancj a sperin che il spetacul cosmic al torni cheste gnot, e al tocjarà controlâ il cîl simpri bande dal Nord, se pussibil lontans des lûs simpri plui fuartis che e taponin tai nestris paîs il cîl stelât. (a.d.g.) – 20.01.2026
