In mont far “fâ comunitât” cence lûs

I Stai, in Comun di Mueç, al è un borc là che si rive dome a pît, suntun troi dal CAI (numar 417), cence Internet ni sunsûr e nancje masse lûs. Di cuatri agns, là sù si fâs une rassegne, “Isola di Stavoli”, che e mude il piçul borc di mont intun laboratori di culture, di comunitât e rigjenerazion dal teritori, dut intune dimension diferente di che de vite di ogni dì. Ancje se no son palcs, lis cjasis, lis plaçutis, i prâts, i trois e i lavadôrs a deventin il lûc di incuintri jenfri i artiscj e il public, intun contat strent par ducj i passe trente apontaments inmaneâts dai 2 ai 5 di Lui in cuatri dîs di spetacui, musiche, danze, laboratoris e altris esperiencis sul teritori. Nassût tant che une scomesse culturâl e deventât un dai events plui vivarôs dal Istât in Friûl, “Isola di Stavoli” al è une grade opare coletive là che ducj a son in vore: i passe 70 volontaris, il public e i artiscj sielts di plui di un centenâr di candidaturis rivadis di dute la Italie. In program, teatri danze cu la innomenade compagnie Balletto Civile di Michela Lucenti, SPK Teatro di Lisa Moras e Alessandro Maione, la cubie Barbara Stimoli-Tiziana Bertoncini, che e sune e e danze tal bosc, il cjantautôr des monts Miky Martina, musiche e archeologjie par cure di 4Homo, il progjet “Cramàrs” dal MOLOM Collective dedicât ae memorie dal teritori e cetant altri. (A.I.) – 01.07.2026