Il confin al devente un percors par scuvierzi storie e teritori

Domenie ai 18 di Setembar ancje Gurize e Nova Gorica a saran cjapadis inte iniziative European Green Belt Days. Ae insegne dal slogan “I confins a separin, la nature e unìs” la iniziative si propon di trasformâ la ex Tendine di Fier intune Tendine Verde, valorizantsi lis potenzialitâts culturâls e ambientâls. Il Egb Days a son zornadis dedicadis in dute Europe a rinfuarçâ la coesion e cooperazion tra i citadins europeans, tacant des areis transfrontalieris.
Su iniziative de associazion Adriatic Greenet, adun cul Kinoatelje, Anpi e altris realtâts locâls, e sarà proponude une escursion cun visitis ai lûcs sul confin e aes struturis dedicadis un timp al control dai confins e cumò riconvertidis al turisim culturâl, par lâ indevant dilunc dai trois intal ambient cjarsulin tra Slovenie e Italie, resonant intun su cemût creâ percors favorevui al turisim sostignibil e pal timp libar.
Si pues partecipâ in biciclete o a pît (intal trat urban e dopo in bus fin a Merna, Sela na Krasu e tornade). (A.D.G.) – 12.09.2022