Gnove aree furnide par cui che al viaze in camper in vie Istituto Tecnico Agrario a Cividât. Il sît, che al cjape une superficie di 4.200 metris cuadris e al ospite 16 puescj, si cjate dongje de pissine comunâl e dal Palaç dal sport e al dispon di cjame e scjame, implant di distribuzion di energjie eletriche e provision idriche, conession internet, bagns par disabii, servizis igjienics cun docis cjaldis e lavabos par plats. La aree e je centade e e dispon di un servizi di video control atîf 24 oris su 24: la volontât dal Comun e je cussì chê di furnî une gnove oportunitât turistiche garantint tal stes timp ancje la sigurece necessarie ai ospits.
L’acès ae aree si pues fâ midiant il smartphone, doprant une app dedicade (InArea) che e permet a ducj i camperiscj, al cost di 12 euros zornalîrs, di fermâsi e doprâ i servizis mitûts a disposizion: ma pe jentrade e je ancje la opzion di indreçâsi in maniere direte ai referents de Unione Nuoto Friuli li de segretarie de pissine comunâl che si cjate dongje de aree camper, che si svante ancje di une altre particolaritât: e je “pet friendly”, e duncje e da acet ancje ae presince di animâi dumiestis. (a.d.g.) – 21.08.2023
