Gleseutis viertis tal Friûl di Mieç par doi dîs

Cualchi an indaûr, il PIC, Progjet integrât culture dal Friûl di Mieç, al veve publicât un volum cul titul “Glesiutis” (sic), cul fin di mapâ, valorizâ e tutelâ lis gleseutis dai cjamps di chê zone. Cul slargjament tai ultin agns dal PIC a altris Comuns, la aree dal Friûl di Mieç si è slargjade ae Basse, si che duncje e je in vore une gnove edizion dal libri “Chiesette campestri del Medio e Basso Friuli”, par cure di Daniele Della Vedova e Lisa Mittone. In spiete de jessude, il P.I.C. al è inmaneât dôs zornadis di visitis a jentrade libare, sore nuie, par viodi – cualchidun pe prime volte – cualchi edifici che al è un patrimoni de comunitât, ma ancje un vuardian de art, de storie, de devozion e des tradizions. In colaborazion cu lis vuidis di Itineraria, la associazion di vuidis turistichis autorizadis pe regjon Friûl-Vignesie Julie e dal progjet di agregazion dai zovins di ‘Ragazzi si Cresce’, compagnâts di esperts e storics dal lûc, sabide ai 12 e domenie ai 13 di Avrîl, des 3 aes 7 di dopomisdì, si podaran sielzi doi itineraris diferents, inmaneâts e pensâts par presentâ la varietât, la bielece e il sens dai edificis. Pe ocasion, a saran vierzudis al public il prin dì lis gleseutis di S. Josef ai Cjasâi Franceschinis in Comun di Muçane, S. Bortolomiu e la Madone dal Sufragji a Palaçûl, Sante Marie a Paravîs (frazion di Pucinie) e Sante Libare a Roncjis. Di domenie, lis gleseutis viertis a son chê di S. Antoni a Gnespolêt (frazion di Listize), Sante Ursule a Vilevuarbe (Basilian), S. Denêl e S. Agostin a Merêt di Tombe e S. Jaroni a Rivis, dongje Sedean. Par rivâ a visitâ miôr lis gleseutis, dongje dai lûcs a saran cartei par indicâ la posizion juste e lis visitis, cence bisugn di notâsi prime, a saran fatis une daûr di chê altre. A Mortean e a Vilevuarbe al sarà ancje pussibil scoltâ i arlêfs des scuelis di musiche Armonie e Domus Musicae. (A.I.) – 11.04.2025