Profum di biscots a pene disfornâts e storiis che a san di tradizion A Friuli Doc, la lenghe furlane e l’innomenât mestri-scaletîr Danilo D’Olivo a saran i ingredients speciâi dal event “Dolçs furlans… Cui ju cognossial? – Scaletarie de tradizion. Liendis e segrets”, metût adun de ARLeF – Agjenzie regjonâl pe lenghe furlane, cu la colaborazion dal Comun di Udin e de Coldiretti F-VJ.
L’apontament al è par sabide ai 13 di Setembar, aes 11, te cort di palaç Morpurgo, tal spazi Coldiretti F-VJ. E sarà une ocasion speciâl par tornâ a scuvierzi, midiant di contis e cercis, la tradizion siore dai dolçs furlans. Al compagnarà il public in chest viaç gustôs Marcutti, il “Friulencer” cun milions di visualizazions, une ironie vivarose e… tant Friûl.
Danilo D’Olivo, storic scaletîr di Il Laboratorio del Dolce di Udin che si misure di simpri cun ricetis antighis de nestre tradizion, al contarà al public storiis e segrets de scaletarie furlane, cuntune atenzion particolâr ai biscots. Al alternarà ricetis che lui stes al à cjapât sù di fonts locâls vie pe sô lungje cariere, cun altris, tiradis fûr dal volum “Mangiare e ber friulano”, ricetari innomenât de cusine tradizionâl furlane, scrit de contesse Giuseppina Perusini Antonini. Pal public di Friuli Doc e sarà pardabon une biele ocasion par scuvierzi cualchi dolç aromai pôc cognossût, di chei che si preparavin une volte pes ricorencis impuartantis.
Insiemi cun D’Olivo al sarà Nicolas Fonzar, cognossût pal canâl Youpaltubo, che aromai al è un dai canâi YouTube plui preseâts dai furlans. Fonzar, che te sô rubriche Mangjâ e murî al invide in mût inmagant e apassionât a scuvierzi la origjin di plats e prodots dal teritori, al presentarà denant vie un gnûf video, propit dedicât ai dolçs furlans.
La conclusion dal event (no podeve jessi diferente) e sarà une degustazion di dolçs, preparâts di Danilo D’Olivo par ufrî a ducj la pussibilitât di sintî i guscj de tradizion e tornâ a scuvierzi une part impuartante dal nestri patrimoni culturâl. (a.d.g.) – 09.09.2025
