E torne la fieste in onôr de pitine Igp, prin presidi Slow Food dal Friûl-Vignesie Julie, la polpete di cjar fumade e drogade (ovine, caprine o in origjin di cjamoç e di cjavrûl), nassude par conservâ la cjar in zonis puaris in maniere tradizionâl intai mês de Sierade e dal Invier.
Apontament sabide ai 11 e domenie ai 12 di Novembar intal cûr de Val Tramontine, intal borc di Tramonç Disore, che si trasformarà intal Marcjât de tiere (cuviert), une mostre marcjât des ecelencis enogastronomichis, tacant de pitine e di chei altris presidis Slowfood regjonâi e talians, cun plui di 50 produtôrs presints che a rivin dal F-Vj, de Italie e ancje di di là dal confin.
Inte grande cusine de fieste, i cogos de Aleance di Slow Food a prepararan lis lôr creazions a base di pitine e no dome: a son chef dal teritori e cierts che a rivin de Ligurie e de Toscane. (a.d.g.) – 31.10.23
