Si sta impiant la proteste dai apassionâts de mont daspò che la associazion Team Quad Livenza e à domandât ae Comunitât di Mont de Cjargne la autorizazion in deroghe par podê lâ ator cui mieçs a motôr dilunc des stradis forestâls in 13 Comuns de Cjargne. Dai 5 ai 7 di Setembar i mieçs cun cuatri ruedis clamâts Quad a varessin di viazâ dilunc chescj teritoris lant su in cuote, passant cussì in zonis di grant valôr naturalistic e ambientâl.
“Dentri dal 28 di Lui – e vise Barbara Puschiasis che su la cuistion de tutele dai trois de mont e puarte indenant di timp une bataie grande – si podarà presentâ memoriis scritis de bande di cui che al pues patî un prejudizi di cheste iniziative.
O sperin che i Comuns de mont che di simpri a disin che lis infrastruturis in cuote alte a saressin stadis dopradis di un turisim lent e rispietôs dal ambient, a si oponin a cheste iniziative. A son cetancj, tra citadins e associazions che vude la gnove di cheste domande, si stan mobilitant par fa sintî il lôr disacuardi bande il fat di doprâ la mont come che al fos un Luna Park”.
La associazion Team Quad Livenza e à ancje publicât ai 11 di Lui, su la sô pagjine di Facebook, une schirie di fotos che a mostrin il sorelûc fat su lis Alps de Cjargne a titul di ricognizion pe manifestazion motoristiche (la foto che o publichin e je une di chês). (a.d.g.) – 25.07.2025
