Cuatri dîs tal borc langobart

Erêts di un passât storic impuartant, chei di Invicti Lupi a fasaran pe seconde volte la rievocazion tal “Borc langobart Invicta Luporum”, la aree che la associazion e je daûr a fâ sù ,un toc par volte. La ricostruzion dal prin vilaç langobart tal mont, par ripuartâ in vite lis lidrîs di Romans, fondât dai langobarts tal 568, cuant che a migrarin te penisule italiche, al è un progjet di valôr pal disvilup dal teritori, che al permetarà la nassite di un centri culturâl di impuartance internazionâl e che vie pai agns si slargjarà par fâ vivi la storie cjaminant dentri di ambients storics realistics. A “Romans Langobardorum”, di joibe ai 11 e fint a domenie ai 14, e cjaparà vite ancje la cuinte edizion dal simposi di sculture e di lavorazion dal metal “Faber Langobardorum”. Cun di plui, a saran ancje cetancj artesans e artiscj che a lavoraran diviers materiâi, tirant dentri i visitadôrs cun aprofondiments culturâi e laboratoris. Si fasarà ancje la cuinte edizion dai “Zûcs Tribâi Langobarts”: competizions di fuarce e abilitât par ripuartâ in vite lis sfidis tribâls antighis che si fasevin tai vilaçs langobarts. E sarà ancje la seste edizion de gare di cusine storiche “Convivium Langobardorum” cun esperts europeans. Dilunc de decime cuarte edizion de rievocazion al sarà presentât il gnûf documentari “La necropoli di Romans: la grande scuvierte”. Une gnove produzion di Invicti Lupi, cu la regjie di Sandra Lopez Cabrera (in program par sabide ai 13 di Jugn aes 9 di sere), che e larà insot di 40 agns di lûs e ombris in merit de valorizazion storiche dal patrimoni langobart di Romans dal Lusinç. In gracie di Invicti Lupi e di une rêt di sinergjiis e di colaborazions, ducj i visitadôrs a podaran vivi ad implen la ete storiche langobarde te gnove aree cun ricostruzions di incjampaments e ativitâts di “living history” gjestidis dai 26 grups di rievocadôrs che a rivin di diviersis regjons de Italie e dal mont. La plui grande rievocazion storiche langobarde a nivel internazionâl e previôt ancje conferencis e cunvignis curadis di storics e archeolics, laboratoris, musiche dal vîf e mostris di art e di fotografie. (A.I.) – 10.06.2026