E va indenant la schirie di presentazions di “Stagjons. Haiku par furlan” la racuelte poetiche scrite di Christian Romanini, scritôr e poete che al sarà ospit doman ai 26 di Setembar a Maian, so paîs di origjin, inte sale consiliâr aes 6 e mieze sot sere, inte suaze de Zornade europeane des lenghis.
Romanini al fevelarà dal parcè che al à decidût di scrivi poesiis par furlan, ma doprant un strument tipic de poesie gjaponês tant che i haiku, scrits doprant dome trê viers, indulà che al covente doprâ pardabon peraulis buinis di dâ emozions.
Dopo l’apontament di Maian, Romanini al sarà ospit cul so libri, scrit in cuatri lenghis (furlan, talian, inglês e gjaponês) a Flambri di Talmassons aes 11 di matine, li dal mulin Braida e miercus ai prin di Otubar a Udin, aes 6 sot sere, inte biblioteche Joppi. (a.d.g.) – 25.09.2025
