La cuiete daspò de tampieste. La tampieste Vaia, che tal 2018 e veve fiscât i nestris boscs butant jù miârs di arbui, e veve dât une vore di ce pensâ par vie de infestazion dal bostric, un piçul inset bon di copâ lis plantis. In cundizions normâls, cheste bestie e tache soredut i arbui plui debii, ma cun tante robe colade par tiere, se no si rivave a netâ il prime pussibil, si veve pôre che e podès moltiplicâsi e trasformâsi tal colp di gracie pai boscs.
A distance di pôc mancul di vot agns di chel disastri, la situazion si sta rivelant une vore miôr di ce che si podeve pensâ e, almancul une volte, cui che al scrîf al pues dâ une buine gnove. No dome o vin rivât a netâ la plui part dai arbui colâts par tiere, ma ancje Mari Nature al somee che e vedi fat la sô part. La conferme nus rive di doi esperts, tant che Giorgio Alberti, ordenari di Silviculture de Universitât dal Friûl, e Iris Bernardinelli, agronome e ispetore fitosanitarie dal Ersa (Ent regjonâl di svilup de agriculture), che a stan daûr ae salût dai nestris boscs di une vore di timp.
“I nestris boscs a àn a ce fâ cun dôs varietâts di disturps: chei abiotics leâts a fenomens come fûc e brut timp o sec, e chei biotics leâts al atac di insets e di patogjens. Dal sigûr i prins a favorissin l’atac dai seconts e al tocje ancje pensâ al fat che cierts arbui a son plui sensibii di altris. Doi fatôrs nus àn judât: il prin al è che inte nestre regjon il mût di taiâ il bosc e il fat che no metìn jù arbui come che a fasin di altris bandis, il bosc si rinove in maniere naturâl e chest lu rint plui fuart. Il secont al è che o vin rivât a tirâ vie in pôc timp la plui part dai lens muarts e che la infestazion dal bostric e je stade ancje limitade dai predadôrs naturâi. Se o fevelìn di altris malatiis, nus dan cualchi pinsîr la murie dal frassin tacât di un fonc intes Vals de Tor e dal Nadison. E daspò e je la murie dal rôl intai boscs dal plan, ma o stin studiant cuâl che al è il probleme. Dut câs, cumò la situazion e je avonde buine”.
Che la situazion e sedi sot control, nus al à confermât ancje Bernardinelli, fitopatologhe dal Ersa: “I dâts che o vin in man a disin che i nestris boscs a son in cundizions avonde buinis e ancje i atacs des malatiis a fasin part de normâl biodiversitât di chescj ambient. La nestre regjon e cure dal 1994 un inventari fitopatologjic e o vin plui di 10 mil schedis, ven a stâi la segnalazion di dams tai boscs par vie des malatiis o dal brut timp, fatis des vuardiis forestâls in dut il teritori, che nus da la pussibilitât di miorâ la gjestion, ancje tal sens di lassâ spazi ae evoluzion naturâl parcè che a voltis si trate di un rinovament dal bosc. Al è par esempli il câs dal bostric, che par solit al tache i arbui plui debii e chest al permet di acelerâ il procès di rinovament cuntune evoluzion naturâl. Vaia e veve fat un dam trement cun passe un milion di metris cubis di len tirât jù, ma ancje se la infestazion e je ancjemò alte, a pet di altris teritoris indulà che l’atac di chest inset al à batût fuart, chi di nô la situazion e je restade sot control. Chest parcè che o vin rivât a tirâ vie la plui part dai lens muarts e, in graciis ancje de colaborazion tra la Universitât di Padue, il Cuarp forestâl regjonâl e l’Ersa, a son stâts adotâts criteris par intervignî prime intes zonis plui a risi. O sin ancje stâts judâts dal fat che in chel moment i boscs a stavin patint pe fuarte infestazion di bostric e i siei nemîs naturâi a jerin cetant atîfs e nus àn judât une vore, di là dal fat che la nestre gjestion forestâl e ten cont de grande biodiversitât dal nestri teritori”.
Al reste il pinsîr pe rivade di bestiis origjinariis di altris continents e pes consecuencis dai cambiaments climatics che, ducj i doi i esperts scoltâts, a visin jessi un fatôr di risi une vore alt par vie dal sec, des temperaduris altis e dai events dal timp trist simpri plui fuarts, bogns di indebilî i arbui. (a.d.g.) – 28.05.2026
